തിരുവനന്തപുരം: ചരിത്രവിജയത്തിന് പിന്നാലെ കോൺ​ഗ്രസിൽ മുഖ്യമന്ത്രി പദവിക്കായി കരുനീക്കങ്ങളും കണക്കുകൂട്ടലുകളും ശക്തം. പി ഡി സതീശനും രമേശ് ചെന്നിത്തലയും കെ സി വേണു​ഗോപാലും മുഖ്യമന്ത്രി കസേര മോഹിച്ച് സജീവമായി രം​ഗത്തുണ്ട്. മുഖ്യമന്ത്രിയെ തീരുമാനിക്കാനും മന്ത്രിസഭാ രൂപീകരണത്തിനുമായി ഹൈക്കമാൻഡ് നിയോ​ഗിച്ച കേന്ദ്ര നിരീക്ഷകരും ഇന്നെത്തും. പാർട്ടിയേയും മുന്നണിയേയും ചരിത്രവിജയത്തിലേക്ക് നയിച്ച വി ഡി സതീശൻ മുഖ്യമന്ത്രിയാകണം എന്നതാണ് യുഡിഎഫ് ഘടകകക്ഷികളിൽ പലരുടെയും താത്പര്യം. എന്നാൽ, വിജയിച്ചെത്തിയ കോൺ​ഗ്രസ് എംഎൽഎമാരാണ് പാർലമെന്ററി പാർട്ടി നേതാവിനെ തെര‍‍ഞ്ഞെടുക്കുന്നതെങ്കിൽ മുഖ്യമന്ത്രിയാകുക കെ സി വേണു​ഗോപാലാകും. 

കോൺഗ്രസ് നിയമസഭാകക്ഷിയിൽ ഭൂരിപക്ഷം എംഎൽഎമാരുടെയും പിന്തുണ കെ.സി. വേണുഗോപാലിനെന്നാണ് സൂചന. കോൺഗ്രസിന്റെ 63 എംഎൽഎമാരിൽ 35 പേർ കെ.സി. വേണുഗോപാലിനെ പിന്തുണയ്ക്കുന്നവരാണ്. തർക്കമുണ്ടായാൽ എ ​ഗ്രൂപ്പിന്റെ 10 എംഎൽഎമാരിൽ എട്ട് പേരും കെ.സിയെ പിന്തുണച്ചേക്കുമെന്നും റിപ്പോർട്ടുകളുണ്ട്. ഇതുകൂടാതെ മൂന്ന് സ്വാതന്ത്രരുടെ പിന്തുണയും തങ്ങൾക്കുണ്ടെന്നാണ് കെ സി വേണു​ഗോപാൽ ക്യാമ്പിന്റെ അവകാശവാദം. അങ്ങനെയെങ്കിൽ 46 എംഎൽഎമാർ കെ സി വേണു​ഗോപാൽ മുഖ്യമന്ത്രിയാകണം എന്ന് കേന്ദ്ര നിരീക്ഷകരോട് ആവശ്യപ്പെടും.

ഭൂരിപക്ഷം എംഎൽഎമാരുടെ പിന്തുണയുണ്ടെങ്കിലും കെ.സി വേണുഗോപാൽ മുഖ്യമന്ത്രിയാകും എന്നുറപ്പില്ലെന്ന് രാഷ്ട്രീയ നിരീക്ഷകർ ചൂണ്ടിക്കാട്ടുന്നു. രാഹുൽ ഗാന്ധിയുടേയുടെയും പ്രിയങ്ക ഗാന്ധിയുടെയും സോണിയാ ഗാന്ധിയുടെയും താത്പര്യവും കേരളത്തിന്റെ പുതിയ മുഖ്യമന്ത്രിയെ തെരഞ്ഞെടുക്കുന്നതിൽ മുഖ്യമാണ്.